Thursday, November 13, 2008

စိတ္တသုခမြန်မာဘုန်းတော်ကြီးကျောင်း(ကိုရီးယား) ပေါ်ပေါက်လာခြင်းအတွက် ဂုဏ်ယူပါသည်...


`စိတ္တသုခမြန်မာဘုန်းတော်ကြီးကျောင်း(ကိုရီးယား)` ဤကျောင်းတော်သည် မကြာသေးမီကမှ ကိုရီးယားနိုင်ငံ အောက်ပိုင်းတွင် ပေါ်ပေါက်လာခဲ့သည့် မြန်မာဘုန်းတော်ကြီး ကျောင်းဖြစ်သည်။ တိတိကျကျ ပြောရလျှင် ၂၄-၁၀-၂၀၀၈ ရက်နေ့ကမှ အငှါးစာချုပ်ဖြင့် အိမ်တစ်အိမ်၏အောက်ထပ်ကို ငှါးရမ်းကာ ဘုန်းတော်ကြီးကျောင်းအဖြစ် ပြုလုပ်ဖန်တီးထားသည့် ကျောင်းတစ်ကျောင်းဖြစ်၏။ နိုင်ငံရပ်ခြားဖြစ်သည့် အတွက် မြန်မာနိုင်ငံပုံစံမျိုး ကိုယ်ပိုင်မြေ၊ ကိုယ်ပိုင်အဆောက်အဦ ဖြစ်ရန်မှာ လွယ်ကူသည့်အလုပ် မဟုတ်ပေ။ သို့သော် ပထမခြေလှမ်းအဖြစ် ငှါးရမ်းကာ ကျောင်းအဖြစ်ဖန်တီး၊ နောက်လစာပျောက်အဖြစ်ကြိုးစား၊ နောက်ဆုံးအပိုင်ဝယ်နိုင်သည်အထိ ရည်မှန်းကာ စတင်လိုက်ကြခြင်းဖြစ်၏။ ပိုက်ဆံပေါ၍ ထလုပ်လိုက်ကြခြင်းကား မဟုတ်ပေ။ သဒ္ဓါတရားအားကောင်း၍သာ မရှိတဲ့ကြားက ရှိအောင်လုပ်လိုက်ကြခြင်း ဖြစ်သည်။

ဤကျောင်းတော် ဖန်တီးဖို့စတင် သန္ဓေတည်ခဲ့သည်မှာ လွန်ခဲ့သည့် ၅လလောက်ကတည်းကပင် ဖြစ်၏။ ၂၀၀၈ခု ၆လပိုင်းလောက်ကဟု ပြောလျှင်ပို၍ တိကျနိုင်ပေမည်။ သို့သော် အကြောင်းအမျိုးမျိုးကြောင့် တိတိကျကျ လုပ်ရှားမှုမပြုလုပ်နိုင်ခဲ့ကြဘဲ လွန်ခဲ့သည့် ၉လပိုင်းမှသာ စတင်လုပ်ရှားလိုက်ကြခြင်းဖြစ်၏်။ အလွန်တိုတောင်းလှသည့် အချိန်အတောအတွင်းမှာပင် ဘုန်းတော်ကြီးကျောင်း အကောင်အထည် ပေါ်ပေါက်လာမှုကို ကြည့်ပါက အကျိုးဆောင်များ၊ စေတနာရှင် အလှူရှင်ရွှေညီအစ်ကိုများ၏ စိတ်ဆန္ဒ၊ စေတနာသဒ္ဓါတရား မည်မျှပြင်းပျကြသည်ကို အလွန်တကူ သိနိုင်ပေသည်။

စင်စစ်ကျောင်းတစ်ကျောင်း လုပ်ကြဖို့အကြံပြုသူကား အခြားသူမဟုတ် ဤကျောင်းဖြစ်မြောက်ရေး ဦးဆောင်ဆရာတော် ဦးဝိစိတ္တပင်ဖြစ်၏။ ဆရာတော်သည် လွန်ခဲ့သည့် သုံးလေးနှစ်လောက်ကတည်းကပင် ကိုရီးယားနိုင်ငံ အောက်ပိုင်းမြို့များဖြစ်သည့် ဒယ်ဂု၊ ဂင်မဲ၊ ဘူဆန်၊ အူလ်ဆန်စသည့် မြို့များရှိ ရွှေမြန်မာများထံသို့ ကြွရောက်၍ တရားဓမ္မများ ဟောပြောပေးနေလျက်ရှိပြီး အောက်ပိုင်းရှိရွှေညီအစ်ကိုများ၏ ကြည်ညိုလေးစားမှု၊ ရင်းနှီးကျွမ်းဝင်မှုကို ရရှိနေသည့်အရှင် ဖြစ်သည့်အပြင် ရွှေညီအစ်ကိုများ၏ အခက်အခဲကိုလည်း အတွင်းကျကျ သိထားသည့်အရှင်လည်း ဖြစ်၏။ ယင်းအခက်အခဲများမှ တစ်ခုကား ကိုရီးယားနိုင်ငံ အောက်ပိုင်းတွင် မြန်မာဘုန်းတော်ကြီးကျောင်း မရှိသေးခြင်းပင်ဖြစ်၏။ ကိုရီးယားနိုင်ငံ အထက်ပိုင်းတွင် မြန်မာဘုန်းတော်ကြီးကျောင်း တစ်ကျောင်းနှစ်ကျောင်း ရှိသော်လည်း တစ်ပတ်မှ တစ်ရက်သာ ပိတ်ရက်၊ အားလပ်ရက်ရသည့် ရွှေညီအစ်ကိုများအတွက်ကား ဘုန်းကြီးကျောင်းရှိရာ အရပ်သို့ သွားရောက်ရန်မှာ မည်သို့မျှ မဖြစ်နိုင်ပေ။ ထို့ကြောင့်လည်း မိမိတို့တူရာတူရာ စုစည်းပြီး တစ်ခါတစ်ရံ ဆရာတော်အား ပင့်ဖိတ်၍ တရားဓမ္မနာကြားခြင်း၊ အလှူဒါနပြုခြင်းများကို လုပ်နေကြရခြင်းဖြစ်၏။ ဆရာတော်ကိုယ်တိုင်လည်း ဒီအခက်အခဲကို သိရှိပြီး ပင်ပန်းခက်ခဲသည့်ကြားမှပင် ကြွရောက်ချီးမြောက်မှုကို ပြုပေးခြင်းဖြစ်၏။ ဆရာတော် မိန့်တော်မူသည့် စကားတစ်ခွန်းကို အမှတ်ရနေမိပါ၏။ `ဒကာတို့အားလုံးစုပြီး ဘုန်းတော်ကြီးကျောင်းရှိရာ သွားတာထက်စာလျှင် တစ်ကိုယ်တည်း တစ်ပါးတည်းဖြစ်သည့် ဘုန်းကြီးက ဒကာတို့ရှိရာ ကြွလာခြင်းက ဒကာတို့အတွက် ပိုပြီးအဆင်ပြေ မယ်ထင်လို့ ကြိုးစားကြွရောက် ဟောပြောပေးနေတာပါ`ဆိုတဲ့ ဆရာတော်ရဲ့ စေတနာကိုသိရတော့ ပိုပြီးကြည်ညိုလေးစားမှု တိုးမိပါ၏။

မှန်ပါသည်။ ဗုဒ္ဓဘာသာ မြန်မာနိုင်ငံသားများ အတွက်ကား ဗုဒ္ဓဘာသာကို အခြေခံထားသည့် မြန်မာ့ယဉ်ကျေးမှုအရ ရောက်လေရာရာ အရပ်ဒေသတိုင်းမှာ ဘာသာတရား အလေ့အထ၊ ဘာသာတရား ယဉ်ကျေးမှုများနှင့် ရင်းနှီးကျွမ်းဝင်နေချင်ကြ၊ အားလပ်သည့် အချိန်များတွင် ဘုန်းတော်ကြီးကျောင်းသို့ သွားရောက်ကာ ဒါန၊သီလ၊ဘာဝနာ အမှုများ ပြုချင်နေကြသည်မှာ ကောင်းမြတ်သည့် အစဉ်အလာတစ်ခုလို ဖြစ်နေကြ၏။ သို့အတွက်ကြောင့်လည်း မဖြစ်ဖြစ်အောင် တတ်နိုင်သည့်အတိုင်းအတာဖြင့် ဘုန်းတော်ကြီး ကျောင်းလေးတွေကို ဖန်တီးကြ၏။ ဘုန်းတော်ကြီးများကို ပင့်ဖိတ်ကိုးကွယ်ကြ၏။ ယခုလည်း ဤကျောင်းတော်ပေါ်ပေါက်လာရန် အားထုတ်ကြခြင်းသည် ယင်းဆန္ဒကြောင့်ဟု ဆိုနိုင်၏။ ဘုန်းကြီးကျောင်း ပေါ်ပေါက်လာသဖြင့် ၀မ်းမြောက်နေကြ၏။ စင်စစ်မည်သည့်ကိစ္စမဆို အကျိုးအကြောင်းစုံမှသာ အောင်မြင်ပြီးမြောက်နိုင်၏။ ယနေ့ကာလတွင် ဦးဆောင်ဆရာတော်များ ရှိနေပြီဖြစ်သလို တက်ကြစွာ လုပ်ရှားပေးကြသည့် အမှုဆောင်များ၊ ထက်သန်စွာ လှူဒါန်းကြသည့် စေတနာရှင်များ၏ ဘက်စုံပြည့်စုံမှုကြောင့် စိတ္တသုခမြန်မာဘုန်းတော်ကြီးကျောင်းဟူသော ကျောင်းတော်တစ်ခု ထင်ရှားလာခဲ့ခြင်းဖြစ်၏။

လွန်ခဲ့သည့် ဆယ်နှစ်ကျော်လောက်ကတည်းက ကိုရီးယားနိုင်ငံကို ရောက်ရှိအလုပ်လုပ်နေသည့် နောင်တော်ကြီး တစ်ဦးက ပြောဘူး၏။ သူတို့ရောက်ခါစက ဘုန်းကြီးကျောင်းရှိဖို့နေနေသာ ဘုန်းကြီးတွေ့ဖို့ရန်ပင် မလွယ်ကြောင်း အခုတော့ ဘုန်းကြီးကျောင်းများရှိနေ ဘုန်းတော်ကြီးများကို ဖူးမြင်နေရသည့်အတွက် အမိမြန်မာပြည် အလွမ်းပြေဖြစ်နေကြောင်း ပြောဖူး၏။ နောင်တော် တစ်ယောက်ကလည်း သုံးနှစ်လောက်နေမှ ဘုန်းကြီးတစ်ပါးကို ရုတ်တရက် ဖူးတွေ့လိုက်ရတဲ့အတွက် မျက်ရည်ပင်လည်မိကြောင်း ပြေားဖူး၏်။ ဒီလိုစကားလေးတွေ၊ အတွေ့အကြံလေးတွေကို ကြည့်ပါက မြန်မာတို့ရဲ့ စိတ်ထဲမှာ မြန်မာ့ယဉ်ကျေးမှုနှင့် ဘာသာတရားအပေါ် မည်မျှအလေးထားသည် တန်ဘိုးထားသည်၊ ချစ်မြတ်နိုးသည်ကို မှန်းဆလို့ရပါသည်။

ယခုလည်းဝမ်းသာစရာပင်။ ကိုရီးယားနိုင်ငံအောက်ပိုင်း မြို့များကို ကိုယ်စားပြုထားသည့် စိတ္တသုခမြန်မာဘုန်းတော်ကြီးကျောင်း တစ်ကျောင်း ဒယ်ဂုမြို့တွင် ဖြစ်ပေါ်လာခဲ့ပေပြီ။ ဒယ်ဂုမြို့တွင် ကျောင်းတည်ရှိနေသော်လည်း ဒယ်ဂုမြို့ပိုင် ကျောင်းမဟုတ်ကြောင်း သင့်လျှော်မည်ထင်၍သာ ဤမြို့မှာ ကျောင်းလုပ်ဖို့ ရွေးချယ်ရခြင်းဖြစ်ကြောင်း ဤကျောင်းသည် အောက်ပိုင်းမြို့များရှိ မြန်မာဗုဒ္ဓဘာသာ အများနှင့် သက်ဆိုင်သည့် ကျောင်းသာဖြစ်ကြောင်း ဦးဆောင်ဆရာတော်မှ မိန့်တော်မူပါသည်။ ဆရာတော်က ဆက်လက်၍ ဤကျောင်းတော်ကို စိတ္တသုခမြန်မာဘုန်းတော်ကြီးကျောင်းဟု အမည်ပေးရခြင်းနှင့် ပတ်သက်၍ ရှင်းပြပေးပါသည်။ စိတ္တသုခဟူသည် ကျောင်း၏အမည်ဖြစ်ပြီး အဓိပ္ပါယ်ကား စိတ်ချင်းသာမှုဟု ဆိုလိုကြောင်း ရုပ်ချမ်းသာမှုထက် စိတ်ချမ်းသာမှုက ပိုအရေးကြီးကြောင်း၊ ကျောင်းတော်ကို စိတ်ဖိစီးမှုများစွာဖြင့် ရောက်လာသည့် မည်သူ့ကိုမဆို စိတ်ချမ်းသာစေလိုကြောင်း ထို့ကြောင့် စိတ္တသုခဟူသော အမည်ပေးခြင်းဖြစ်ကြောင်း၊ မြန်မာဘုန်းတော်ကြီးကျောင်းဟူသည် ကိုရီးယားဘုန်းကြီးကျောင်းများနှင့် ကွဲပြားစေလို၍ဖြစ်ပြီး ရိပ်သာ၊ စင်တာစသည်များနှင့်ကွဲပြားစွာ ဘာသာရေး၊ သာရေး၊ နာရေး၊ စသည်တို့ကို လွတ်လပ်စွာ ဆောင်ရွက်နိုင်သည့်အဓိပ္ပါယ်မျိုးဖြင့် စိတ္တသုခရိပ်သာ၊ စိတ္တသုခစင်တာဟု အမည်မပေးဘဲ စိတ္တသုခ မြန်မာဘုန်းတော်ကြီးကျောင်းဟု အမည်ပေးခြင်းဖြစ်ကြောင်း အသေးစိပ် ရှင်းပြပါသည်။

ပြီးခဲ့သည့် စနေ၊ တနင်္ဂနွေ(၈၊၉-၁၁-၀၈) ရက်မှစ၍ ကျောင်းတော်သို့ ဆရတော်ကြွရောက် သီတင်းသုံးတော်မူ ပါသည်။ ထိုအချိန်က ဆရာတော်နှင့် တွေ့ဆုံပြီး လက်ရှိငှါးရမ်းထားသည့် ကျောင်းနေရာကို လှည့်ပတ်ကြည့် ရှုမိပါသည်။ ပေးရသည့်စဘော်၊ လစာများနှင့်ကြည့်လျှင် အလွန်တန်သည်ဟု ဆိုရပေမည်။ ကျောင်းတော်တွင် ဆရာတော်အတွက် အခန်းတစ်ခန်း၊ ဘုရားခန်းနှင့်သံဃာတော်များ သီတင်းသုံးနေနိုင်သည့် အခန်းကြီးတစ်ခန်း၊ ယင်းအခန်းနှင့် တစ်ဆက်တည်း သမံတလင်းခင်း အခန်းကျယ်ကြီး တစ်ခန်းပါဝင်သည်။ ယင်းအခန်းကျယ်ကြီးအား အပေါ်မှာကွက်ပြစ်သဘောခင်း ဖယောင်းပုဆိုးစသည် ခင်းလိုက်ပါက လူအရောက် သုံးလေးဆယ် တရားနာနိုင် အခမ်းအနားလုပ်နိုင်သည့် အနေအထားရှိသည်။ နောက် ဆရာတော်အခန်းနှင့် ကပ်လျက် မီးဖိုချောင်၊ မီးဖိုချောင်ရှေ့ ရေချိုးခန်းအိမ်သာ ပါရှိပြီး နောက်ဘက်တွင် အလျားပေ သုံ်းဆယ်ခန့်၊ အနံခြောက်ပေခန့် ရှိသည့်အမိုးအကာပါ နေရာအလွတ်နှင့် သီးသန့်အိမ်သာ တစ်ခုလည်း ပါရှိလေသည်။ ခြုံပြီး ကြည့်ပါက ပေးရသည့် ကုန်ကျစာရိတ်နှင့် ထိုက်တန်စွာ အသုံးဝင်သည့် နေရာတစ်ခု ဖြစ်သည်ဟု ဆိုနိုင်ပေသည်။ ထိုနေ့က ဆရာတော်ကိုယ်တိုင် လှည့်လည်ကြည့်ရှု လိုအပ်သည်များ စီစဉ်ညွှန်ကြားပြီး နံနက်ငါးနာရီတွင် ကျောင်းတော်တွင် သီတင်းသုံးအပူဇော်ခံမည့် ဘုရားဆင်းတုတော်အား အနေကဇာတင် အန္တရာယ်ကင်း ပရိတ်များရွက်ပွားမှုများပြုလုပ် တရားဓမ္မချီးမြှင့်ပါသည်။ ထို့နောက် နံနက် ကိုးနာရီခွဲခန့်တွင် ကျောင်းတော်ရေရှည်ထိန်းသိမ်းစောင့်ရှောက်နိုင်ရန် ရည်ရွယ်၍ အစည်းအဝေးကျင်းပကာ ကျောင်းရေရှည် ထိန်းသိမ်းစောင့်ရှောက်ရေး အကျိုးဆောင်အဖွဲ့ကို ပြန်လည်ဖွဲ့စည်းပြီး ရှေ့လုပ်ဆောင်မည့် လုပ်ငန်းစဉ်များကို ဆွေးနွေးညှိနှိုင်းကာ ဆရာတော်၏ သြ၀ါဒကို ခံယူကြသည်။

ဆရာတော်က မိမိသည် ယခု ဒီဇင်ဘာလအထိ စနေ၊ တနင်္ဂနွေနေ့များတွင်သာ ကြွရောက်သီတင်းသုံးနိုင်မည်ဖြစ်ပြီး ၂၀၀၉ ၁လပိုင်း ၁ရက်နေ့မှ စတင်ကာ အမြဲနေထိုင် သီတင်းသုံးတော်မူမည်ဖြစ်ကြောင်း၊ သီတင်းသုံနေစဉ်ကာလတွင် စနေနေ့ ညနေ ၄နာရီခွဲမှ ၇နာရီအထိ ဆိုးလ်မြို့တွင် ကိုရီးယားနိုင်ငံသားများအား ဓမ္မစကြာသင်တန်းပေးရမည်ဖြစ်ပြီး တနင်္ဂနွေနေ့ နေ့လယ် ၂နာရီမှ ၄နာရီအထိ ကျောင်းတော်တွင် စိတ်ပါဝင်စားသူ ရွှေညီအစ်ကိုများအား ကိုရီးယားဘာသာစကား (အရေး၊ အဖတ်၊ အပြော)ကို သင်ကြားပို့ချပေးမည်ဖြစ်ကြောင်း ကျန်ရက်များတွင်ိ စိတ်ဝင်စားသူ ကိုရီးယားများနှင့် မြန်မာများအား ၀ိပဿနာတရားပြသပေးမှာဖြစ်ကြောင်းနှင့် ဘာသာပြန်လုပ်ငန်းများကို ပြုလုပ်မှာဖြစ်ကြောင်း စသည်ဖြင့် ဆရာတော်ဆောင်ရွက်မည့် လုပ်ငန်းစဉ်များနှင့် ပတ်သက်၍ မိန့်တော်မူကာ အကျိုးဆောင်များနှင့် ကျန်ရွှေညီအစ်ကိုများအားလည်း ညီညီညွှတ်ညွတ်ရှိကြဖို့နှင့် ဘုန်းကြီးနှင့်ပတ်သက်၍ ဖြစ်စေ၊ ကျောင်းတော်နှင့် ပတ်သက်၍ဖြစ်စေ အကွဲကွဲအပြားပြားဖြစ်မည်ကို မည်သို့မျှ လက်ခံမည်မဟုတ်ကြောင်း ထို့ကြောင့် အားလုံးနားလည်မှုရှိစွာ စည်းစည်းလုံးလုံး ရှိကြဖို့လိုကြောင်း ဘာပဲလုပ်လုပ်အစွန်းမရောက်ဖို့လိုကြောင်း မိန့်ကြားပါသည်။

ကျောင်းတော်စတင်သန္ဓေတည်သည်မှ အကောင်အထည်ပေါ်ပေါက်လာသည်အထိ အစအဆုံးသိရှိနေသည့် ကပ္ပိယတစ်ယောက်အနေဖြင့် ကျောင်းတော်ပေါ်ပေါက်လာခဲ့မှုအပေါ် အတိုင်းထက်အလွန် ၀မ်းမြောက်ဝမ်းသာ ဖြစ်ရသလို ရေရှည်တည်တံ့ပြန်ပွားရန်အတွက် ထိန်းသိမ်းစောင့်ရှောက်ရမည့် တာဝန်ကိုလည်းစိတ်ထဲမှာ မိမိကိုယ်ကို မိမိပေးအပ်နေမိပါ၏်။ တစ်ဘက်ကလည်း ရွှေညီအစ်ကိုများကို ဆရာတော်၏ သြ၀ါဒအတိုင်း စည်းလုံးညီညွှတ်စွာ အတူတကွ ၀ိုင်းဝန်းထိန်းသိမ်း စောင့်ရှောက်ပေးကြဖို့ တိုက်တွန်းနေမိ၏်။ ထပ်မံ၍လည်း ရွှေညီအစ်ကိုများအား တိုက်တွန်းနှိုးဆော်လိုက်ပါသည်။ `အားလုံးညီညီညွတ်ညွတ် ထိန်းသိမ်းစောင့်ရှောက်ကြပါစို့…ညီနောင်အပေါင်းတို့`
ဆရာတော်၏ မေတ္တာပို့အတိုင်း ဆုတောင်းပေးလိုက်ပါသည်။ ``စိတ္တသုခ၊ ပြည့်စုံကြ၊ ဒုက္ခထွေထွေ၊ ကင်းပါစေ``

ကပ္ပိယဆန်းကြယ်

0 comments:

Recent Posts Widget | Webaholic

RECENT POSTS

Grab this Widget

 
3 Columns Blogger Template by Amanda at BloggerBuster